Pemutus Peresa Nembiak Serian Patut Dikemanah



SERIAN: Opis Pelajar Pelilih (PPD) Serian diansak chakah agi ngatur program ke tau nyaup ngangkatka tikas pelajar kelebih agi sentang chara ngemanah pemutus peresa nembiak di pelilih nya.

Menteri Nembiak, Lumba enggau Penyerakup Dato Sri Michael Manyin madah pekara nya berat ngambika pemutus peresa perintah ungkup peranak Serian dalam timpuh lima taun ke deka datai setikas enggau pemutus pelilih bukai.

“Dalam timpuh berapa taun ke udah, pemutus peresa nembiak di Pelilih Serian enda manah enti dibandingka enggau pelilih bukai.

“Beratika pemutus nya, opis pelajar pelilih Serian meseti ngadu program ke ulih ngubah pemutus nya.

“Aku udah madah ngagai Pemesai Pelajar Pelilih Serian (Yunus Apok), dalam timpuh lima taun ti deka datai iya meseti ngubah pekara tu,”ku iya.

Manyin mansutka jaku nya ba Program Transformasi Minda Bestari “Serian ‘A’ Star” di Balai Mayuh Guna Kampung Pichin ditu, kemari.

Ngemujur juluk nya, Manyin ke mega ADUN Tebedu udah ngagihka RM100 000 ngagai Opis Pelajar Pelilih Serian dikena ngadu program ke bekaul lalu RM100 000 agi ungkup Palan Pematih Pengajar (IPG) Batu Lintang ke ngadu program di sekula primari dalam pelilih nya.

Meretika graduet ari pelilih Serian kurang enti dibandingka enggau pelilih bukai, Manyin madah duit insentif RM500 deka diberi ngagai nembiak ke bisi nerima surat terima masuk universiti, kolej enggau palan pelajar tinggi bukai.

“Aku nguji nerenak pemerat guna pelajar ngagai peranak Serian. Kitai udah ngepunka insentif nya ba taun tu lalu deka ditampung ba taun ti deka datai.

“Naka ke diatu, penyampau RM50,000 udah dipelanja ungkup tuju nya,”ku iya.

Penyampau 385 iku nembiak UPSR (primari enam) ke dipilih ari sekula primari ngelingi Serian datai ngulu Program Transformasi Minda Bestari “Serian ‘A’ Star”.

Program ke berengkah ari 19 nyentuk ngagai 21 Ogos 2016 nya diatur enggau tuju nambah penyampau nembiak ke tau bulih ‘A’ – 6A tauka 8A ba peresa UPSR taun 2016.

Bela datai PPP Yunus Apok, ketuai komuniti, bala pengajar enggau orang bukai.-UB

No comments:

| | Copyright © 2014 SARAWAKIANA