NGO Dayak, Platform Ngempung Komuniti Dayak



KUCHING: Gerempung Dayak Ukai Dikuasa Perintah (NGO) dipinta ngenyemakka diri agi sereta mungkur semua lebuh ngaga aktiviti ari ti ngemeratka pekara ekslusif ba sekeda pekara aja.

Sapit Kepala Menteri Tan Sri Datuk Amar Dr James Jemut Masing madah, NGO ti ngarika semua komuniti Dayak anang ngira gerup enggau kuing politik, ngambika NGO tu ulih bejalaika pengawa enggau ngasi.

“NGO Dayak tu meseti nyadi platform ngagai bansa Dayak ngambika ulih begempung gawa ke pemaik komuniti, taja pan kaban nya datai ari parti politik ke bebida tauka ngembuan ide-ologi politik ke nyelai, tauka enda ngaul diri ba pekara politik.

“NGO ti Dayak enda patut disereta semua bansa Iban aja tang mega enda tau enda bisi bansa bukai baka Bidayuh enggau Orang Ulu,” pia ku iya lebuh ti nerima penemuai basa ari raban Nembiak Sarawak Dayak National Union (SDNU) ba opis iya kemari.

Nemuai basa nya betuaika Ketuai Pampang Nembiak SDNU Churchill Edward Drem ke lalu ngagau-ka Masing nyadi patron Pekit Betaboh Nembiak SDNU 2016, ti deka diatur kena 30 Oktober tu.

Berebak enggau nya, Masing mega diberi penerang pasal sejarah numbuhka Pampang Nembiak SDNU, kuing enggau juluk nem-biak Dayak.

Ba awak nya, Masing setuju ngungkupka belanja RM15,000 ngagai pekit nya, ngambika ulih ngangkatka pengerindu nembiak ba main betaboh, ti mega siti ari main asal bansa Dayak.

Nengah awak nya mega, Churchill madahka pekit nya diatur dikena ngenegapka pengawa ngintu main asal sereta ngelakuka main nya ngagai mensia mayuh kelebih agi nembiak rebak baru.

Dipelabaka semua tim ari serata nengeri Sarawak nyengkaum siti tim ti dikangauka ari Kapit bisi masuk ba pekit nya ti deka diatur ba sebengkah palan bebeli barang ditu.

Iya mega madah, siti ari pengawa ti deka diatur SDNU taun tu iya nya bejadi Pampang Nembiak SDNU Siol Kandis ba bulan September sereta mega bejadika Unit SDNU Stakan ba bulan November.

Sama bisi maya nya Sekretari Politik Kepala Menteri Datuk Seri Doris Sophia Brodie, Sekretari Masing Robert Liman, Sekretari Pampang Nembiak SDNU, Surai Andrew Abell, Sapit Sekretari Stephanie Ruwi Edward, enggau ka-ban exco Desmond Joseph sereta Priscilla John.

Masing dulu ari ari nerima penemuai basa Sarakup Indu Dayak Sarawak (SIDS) pampang Samarahan betuaika chairwoman Emas Gijak, ke alai iya udah ngungkupka belanja RM20,000.-UB

No comments:

| | Copyright © 2014 SARAWAKIANA