Konsep bekunsi kuasa enda dipebasaka agi?


KUCHING: Pemutus nerima lima iku Kaban Kunsil Nengeri (ADUN) ke nadai parti masuk Parti Pesaka Bumiputera Bersatu (PBB) ngeruga konsep bekunsi kuasa ti udah dikemeran Barisan Nasional (BN) nengeri ngelama tu.

Mansutka jaku tu, Chairman DAP Sarawak Chong Chieng Jen madah pemutus Kepala Menteri Datuk Patinggi Tan Sri Adenan ke mega Chairman BN Nengeri enggau Presiden PBB ngeruga konsep nya ke dikemeran kenyau 1974.

“Lima iku ADUN ke nadai parti udah masuk PBB ngujungka parti nya diatu bisi 45 penuduk,ngelui 50 peratus ari penyampau semua penuduk DUN.

“Tu meri pengelantang PBB ngatur tusun merintah lalu numbuhka perintah nengeri kediri.

“Perkara tu enda ngipakka konsep bekunsi kuasa entara parti dalam serakup BN ke dikemeran kenyau taun 1974 ke alai maya nya semua parti udah setuju nadai seiti parti ngembuan majoriti penuduk,”ku iya ba aum pengarang berita kemari.

Dulu agi ari nya Chong udah bejadi Buletin The Rocket Edisyen Sarawak di Indu Opis DAP ditu.

Chong ke mega ADUN Batu Kawa enggau MP Bandar Kuching mega madahka Adenan udah enda ngamatka semaya sebedau PRN11 ke alai iya deka bebasaka konsep bekunsi kuasa nya.

Ku Chong nambah, nadai seiku ketuai dalam serakup BN berani mantah pemutus nya ketegal irauka penuduk diri dalam parti.

Iya nagasai parti bukai dalam serakup nya, Parti Rakyat Sarawak (PRS), Parti Sa’ati Rakyat Sarawak (SUPP) enggau Parti Demokratik Progresif Sarawak (SPDP) semina nyadi pengias dalam BN nengeri.

“Kitai enda ulih ngarapka sida (parti bukai kelimpah PBB dalam serakup BN) ba pengawa ngenanka hak kitai. Enti sida enda ulih negika peneka diri, katika kitai ulih ngarapka sida negika pinta rayat,”ku Chong.

Hari Dua tu tadi, Adenan ba seiti aum pengarang berita di Wisma Bapa Malaysia mutus chara prisnsipal nerima pinta lima ADUN nadai beparti, Miro Simuh (Serembu), John Ilus (Bukit Semuja), Datuk Gerawat Gala (Mulu), Rosey Yunus (Bekenu) enggau Paulus Palu Gumbang (Batu Danau) nyereta PBB.

Adenan bela besemaya PBB ke nguasa 45 penuduk DUN nadai ngembuan juluk ngeruga konsep bekunsi kuasa entara parti dalam serakup BN.

Bela datai MP Stampin Julian Tan, ADUN Pending Violet Yong enggau ADUN Padungan Wong King Wei.-BP

No comments:

| | Copyright © 2014 SARAWAKIANA