Isu petronas enda ibuh agi dikemesai


KUCHING: Pekara pasal permit kereja Petronas di menua Sarawak ti diketu, enda ibuh digaga nyadi seiti penanggul ke besai lalu badu agi mayuh peragam ba pekara nya, ku Sapit Kepala Menteri Datuk Amar Douglas Uggah Embas.

“Enda ibuh kelalu mayuh peragam, Perintah Nengeri ke betuaika Kepala Menteri Datuk Patinggi Tan Sri Adenan Satem sigi naka ulih mutarka pekara nya.

“Besabar lalu nganti Perintah Nengeri ngemutarka pekara tu enggau naka iya pemanah, lalu nambah enggau nya mega Petronas pan beratika pekara tu enggau positif,” ku Uggah.

Iya madah munyi nya lebuh dirandau pengudah bejadika pengerami makai lemai ke digulu urung lebih 1,000 iku penyereta ke bisi enggau, Kongres Tanah Ami Antarabansa ke-15 di sebengkah hotel antarabansa ditu, malam ensanus.

Uggah ti mega nyadi Menteri Pengawa Betanam Betupi Moden enggau Ekonomi Menua Pesisir madahka Petronas deka baum baru enggau Perintah Nengeri pagila (Hari Enam).

Iya madah aum nya digaga berindik ari aum ke udah digaga dulu agi ari nya (Hari Satu tu tadi) berindik ari pemutus Perintah Sarawak mansutka ‘maratorium’ ba semua permit kereja baru ke pengereja pengawa Petronas ari luar Sarawak, gawa di menua tu.

“Hari Satu tu tadi, aum kami enggau Petronas bejalai enggau manah…Mayuh pekara ke bisi dipejuraika enggau manah, lalu nya kebuah mega kami baum baru hari Enam tu (pagila),” ku iya.

No comments:

| | Copyright © 2014 SARAWAKIANA