Anang Malu Nyanda Belanja Ari Yayasan Sarawak



KUCHING: Nembiak Dayak di menua tu ke deka nampung pelajar sida iya ngagai universiti tauka kolej tang bisi penanggul ba sukut belanja diperansang minta ngagai Yayasan Sarawak.

Chairman Serakup Indu Dayak Sarawak (SIDS) Tan Sri Dato Sri Empiang Jabu madah Yayasan Sarawak bisi wang turu sida iya mantu ke dikena mantu nembiak ke nadai tauka kurang pemisi deka nyambung pelajar.

“Nama nembiak nadai tambang, nembiak suntuk, ambika chunto, di Yayasan tau alai nyanda belanja ke ulih dikena sida iya terubah mansang belajar laban udah nya sida iya tau minta pinjau ari ejensi bukai ke bisi nyendiaka wang turu.

“Nya alai diatu, sapa nembiak Dayak ke deka masuk universiti, nadai teulihka tulung, nadai duit dikena meli tikit bilun, Yayasan Sarawak bisi nyediaka wang turu belajar, ke ulih alai bala nembiak nyanda belanja.

“Mayuh apai indai enda nemu, sida iya tusah ati begiga belanja kin-kitu. Nya alai, aku meransang kita betemu terus enggau Yayasan Sarawak,” ku iya.

Iya madah munyi nya lebuh bejaku bejadika atur pengawa Nyuaka Perais Peransang Anembiak Cemerlang ngagai anak SIDS ti udah nyulut dalam pelajar sida iya, di sebengkah hotel ditu, ensanus ke digulu lebih seratus iku kaban serakup nya.

Nya alai ku iya, bala nembiak ke bulih masuk ngagai UiTM, universiti, tang nadai duit kena meli tikit bilun, bala nembiak tau ngelawa Yayasan Sarawak.

“Enti dibanding enggau kelia, serakup tu sigi pedis endar ngulihka belanja, ukai baka diatu. Kelia, kami tu (komiti) ke mansut tauka ngena duit diri empu kena melanja nembiak ke deka nyambung pelajar sida iya ngagai universiti.

“Keterubah kami kelia ngepunka wang turu ke nembiak sekula, minta pupu belama enti bisi baum serakup. Ari nya meh kami ngumpul mimit-mimit dulu ngepunka wang turu, taja pan maya nya sigi enda chukup baka kediatu ke nerima pan ari Perintah tauka ari aktiviti serakup,” ku iya.

Empiang ti mega nyadi Kaban Kunsil Besai Yayasan Sarawak, antara orang ke keterubah enggau mungkal numbuhka wang turu di Yayasan Sarawak, ngambika ulih dikena mantu nembiak ke nadai pemisi.

“Nya alai diatu, sapa nembiak ka ngagai universiti, nadai tulihka tulung, nadai duit kena mayar tikit bilun, Yayasan Sarawak bisi wang turu sida iya mantu nembiak ke nadai pemisi,’ ku iya.

Kelimpah ari nya, ba pekara meri insentif ngagai anak serakup (SIDS) ke udah nyulut dalam peresa tauka pelajar sida iya, kelebih agi ngagai bala nembiak kitai Iban ke teulihka pemutus ke manah, dalam peresa UPSR, PT3 (suba dikumbai PMR), SPM, STPM, ari 1985, SIDS udah belabuh meri nembiak serakup ke nyulut dalam pelajar sida iya.

Iya ngelalau pampang serakup bukai di serata menua tu sama mantu meri insentif ngagai nembiak Dayak kelebih agi nembiak Iban ke nyulut dalam pelajar sida iya.

“Kami ari Indu Opis, sigi ninting taun kami nulung bala nembiak. Ngagai semua pampang Serakup serata menua Sarawak, tiap pampang dilalau meri insentif ‘cash’ ngagai nembiak ke bulih pemutus peresa ke mujur.

“Semua pampang dilalau meri wang, ngambika nyadi peransang bala nembiak kitai ka agi belajar. Kitai mesti gaga ati laban nembiak kitai bulih pelajar ke manah laban kitai Iban, nadai utai ke lebih agi ari pelajar sekula ke tau ngangkatka pengelantang pendiau sida iya jemah ila,” ku iya.

Ba bala nembiak ke enda pandai dalam akademik, tang landik jari tauka penemu, dilalau ngambi ulih masuk ngagai kolej ke ngajar pengelandik.

“Enda ibuh kitai ngagai universiti ke menua tasik, laban kitai mayuh universiti ke manah di menua tu. Nambah enggau nya, sida ke enda landik dalam akademik tang pandai pengelandik, kitai pan mayuh kolej pengelandik.

“Utai ke diguna bala anak kitai, begunaka kertas, setipikit kena sida iya ngiga pengawa ke diri empu jemah ila. Nya alai kami, serakup bebendar endar meri insentif, awakka sida iya bulih pemutus peresa ke mujur.

“Ke bedau nerima nya, pajakka pelajar kita, kami meransang kita ngambika bulih insentif ari serakup,” ku iya.

Kelimpah ari nya, Empiang nandu baru madahka kitai mesti meri puji ngagai apai indai, jaku kelala, jaku puj, ngagai bala anak kitai laban dipeda deka belajar awakka sida dipeda ari komuniti kitai.

“Jaku lalau tauka siru bansa tu, sama-sama digaga ulih apai indai sereta pengajar ngagai bala nembiak kitai. Nambah enggau nya, apai indai mega dilalau ngemataka pengawa anak sida iya,” ku iya.

Ba nembiak ke kurang landik dalam akademik, Empiang madah, Yayasan Sarawak mega mayuh udah muka palan pelajar pengelandik di serata menua tu ke tau alai nembiak Dayak belajar.

“Baik nya deka belajar ngaga muto, ngaga buk, nuchi mua, belajar ngurut…..mayuh asil ari pengelandik jari kena ngiga duit, baka pengawa nusuk manik tauka betenun, kena ngidupka diri.

“Aram sama-sama nulung anak kitai, anak bansa kitai,” ku iya.

Ba atur pengawa nya kemari, urung 20 iku nembiak ke udah nyulut dalam peresa sida nerima duit peransang ari SIDS, nyengkaum meri setipikit udah nembuka pengelandik jari nusuk manik ngaga Marik Empang Moden ngagai urung 20 iku raban SIDS.

Sama bisi enggau ngulu atur pengawa nya kemari, sapit chairman SIDS Datin Catherine Gramong enggau Sekretari Besai serakup, Datin Senorita Linang.-UB

No comments:

| | Copyright © 2014 SARAWAKIANA