Media Rama: Anang Nunda Ulah Ti Tau Mai Penyarut



SIBU: Bansa Dayak bela enda tinggal ari ke dipejah orang bukai nengah media rama ketegal ti deka meda penyerakup bansa tu pambar.

Temenggung Stanley Geramong madah, diatu nyauka genap iku orang landik bekenaka internet nejuka mayuh bengkah penemu, berita enggau macham bengkah penerang bela dibantai sereta jampat bendar ngerekai.

“Tang kitai anang enda nemu ukai semua berita tauka penerang ke dibantai nengah media rama semua nya amat laban mayuh agi ke digerini tauka endang sigi bula nyengkaum bisi nya sengaja ditempa dikena ngasuh orang bukai pedis ati.

“Iya ti balat ngasuh kitai nangi iya nya jaku ke sengaja ditempa dikena mambarka bansa kitai Dayak.

“Kitai anang kelalu nitihka pemedis ati tauka kelalu gagit nunda ulah orang bukai ti tau ngujungka penyarut nyadi ketegal jaku umbuk orang nengah media rama,” pia ku iya madah.

Iya mantaika jaku tu maya bejadi Panggau Pengerami Mantaika Main Asal Borneo (BDCF) 2016 ditu, lemai kilah ensana.

Sama bela bisi datai maya tu iya nya Penyanding Penemu BDCF 2016 Sempurai Petrus Ngelai, Chairman Komiti Pengatur BDCF 2016 Paulus Dandee Banyang enggau Chairman Gerempung Dayak Sarawak (SDNU) Pampang Sibu Chambai Lindong sereta bala bukai.

Stanley mega maya tu ngelalau bala bansa Dayak lebih agi rebak baru diatu ukai semina anang kelalu terunda enggau jaku ke ditempa ba laman rama baka ‘Facebook’ tang mega anang nempa tauka ngaga isu bansa ba laman rama baka nya.

“Enti kitai enggai meda bansa kitai dipejai orang, kitai anang ngepun ngaga isu bejai orang.

“Kitai ditu udah lama begulai enggau pangan diri ti enda sebaka bansa tauka jalai pengarap.

“Anang ketegal jaku ke enda menuku ngasuh penegut pengelikun kitai ngelama tu nya tebererak,” ku iya madahka baru.

Berebak enggau tu mega, Stanley bela mantaika penemu sentang pemesai guna pelajar dikena bansa Dayak ngubah tikas pengidup diri.

Ku iya, pemesai Dayak ari dulu suba endang bebendar ngansak bansa Dayak ngemeratka pelajar anak sida nyentuk ke penemu seiti ruang bilik meseti bisi seiku graduate ditengkebang.

“Ba apai indai, kitai bebendar mih nyengulaka anak ngambika sida bulih pelajar ti menyana lalu ngubah pengidup ruang bilik kitai.

“Pia mega bala anak anang enda berunding pemerinsa apai indai kita nyengulaka kita nyentuk ke pandai.

“Anang ngelebu sida ti ngandalka kita ulih mai sida ngasaika penyenang bepun ari pemujur kita ba sekula nyentuk bulih pengawa ti menyana dudi hari ila,” pia ku iya madah.

Bekenangka pengawa lemai nya, Stanley muji pemujur komiti pengerami ti ngatur BDCF.

Iya madah, pemujur nya endang bepun ari ulah ti rindu besaup enggau pangan diri.

“Ngarapka BDCF semampai mujur diatur nyentuk ke ila-ila laban pengerami tu besai reti ba bansa kitai ti ukai semina deka mandangka main enggau adat asal aja tang mega deka mai bala rebak baru bela besaup ngetanka pesaka asal kitai tu,” ku iya madah.-UB

No comments:

| | Copyright © 2014 SARAWAKIANA