Kembuan Ulah Ke Manah Sereta Intergriti Ti Tinggi



KAPIT: Residen Pelilih Menua Kapit, Joseph Belayong madahka Hari Intergriti Perkhidmatan Awam patut diatur di menua tu.

Ku iya, bala ke gawa perintah patut ngembuan intergriti ke tinggi sereta ngempu ulah ke manah.

“Intergriti tu seiti ari daya idup kitai kelebih agi sesiku ke gawa enggau perintah. Kitai meseti bisi intergriti ke tinggi. Nya alai, Sekretari Nengeri, Tan Sri Datuk Amar Morshidi Gani amat terit lebuh ngambi orang gawa perintah. Peminta ari orang ke minta gawa perintah disarap ba lima renggat dikena nentuka sapa bagi ti ulih gawa enggau manah ba opis perintah.

“Hari Intergriti Perkhidmatan Awam tu patut diatur ba semua pelilih ba nengeri tu. Intergriti ukai semina bisi lebuh ke gawa aja tang mega lebuh ke meri servis ngagai mensia mayuh. Keterubah meseti jampat, efisyen enggau nadai sebarang sebana. Nya alai dedini endur ba opis perintah meseti dilekatka stiker ‘intergriti’ awakka sida ke gawa perintah nya ulih meri servis ke manah sereta bekualiti,” ku iya.

Iya bejaku munyi tu lebuh ngulu Gempuru Hari Intergriti ba laman Kompleks Perintah Nengeri, Jalai Bleteh ditu ti digulu urung tiga ratus iku ngarika empat puluh opis perintah enggau ejensi ke bukai.

Iya mega ngelalau orang ti gawa perintah ngaga pengawa sida iya enggau basa ke tinggi sereta meri servis naka pemanah ngagai rayat. Nya mih kebuah perintah ngaga seiti Palan Unit Transformasyen (UTC) laban opis perintah semina gawa lima hari dalam seminggu. Semua servis tau diadu ba UTC ditu magang. Iya mega ngarapka UTC bisi ditumbuhka di Kapit dudi hari ila, laban nya ulih meri ngagai mensia mayuh.

“Pia mega enggau KPI ke dianjung ninting bulan enggau ujung taun laban deka meda nama pengawa ke udah digaga sepemanjai taun. Enti suba nadai tentu begunaka KPI, abis taun abis mih pengawa. Mensia mayuh, mayuh besebana pasal pengawa ti lubah dikereja raban pengereja pengawa ba opis tauka enda meri servis ti manah. Tang diatu kitai meseti jampat mutarka penanggul tu. Ambika chunto, sebana ti dikenataika nyadeka diputar dalam kandang dua puluh empat jam aja. Tu mih kebuah orang ke gawa perintah patut meri servis naka ke manah ngagai mensia mayuh,” ku iya

Sama bisi datai maya tu tadi, Pemesai Opis Pelilih Song, Jackline August, Sapit Residen Pelilih Kapit, Minggu Jampong, Ketuai Polis Pelilih Kapit, Freddy Bian enggau raban pengereja pengawa perintah.-UB

No comments:

| | Copyright © 2014 SARAWAKIANA