Formula Ungkup ADUN Nadai Parti Benung Diadu



KUCHING: Sebengkah formula benung ditusun dikena nentu sekalika semilan iku pengari rayat (Kaban Kunsil Nengeri tauka ADUN) nadai beparti ke udah menang bediri nengah tikit chalun terus Barisan Nasional (BN) ulih diterima dalam BN.

Bejaku ngagai pemberita kemari, Sapit Presiden PBB Datuk Amar Abang Johari Tun Openg madah formula nya deka dibantai pengudah tembu Lumba Malaysia (SUKMA) 2016 tauka sebedau Aum Kunsil Nengeri (DUN) ba bulan Oktober tauka November tu.

Ku Abang Johari, Kepala Menteri ke mega presiden PBB bisi formula sentang atur nerima sida semilan nya dalam BN.

“Asai aku, formula nya deka disetuju semua serakup parti dalam BN nengeri.

“Aku enda ulih madah ditu, Kepala Menteri enggau Komiti Kereja Tinggi (MKT) parti deka mantaika formula nya,”ku iya.

Tajapia, Abang Johari ke mega Sapit Kepala Menteri madah pemutus mengkang dilempaika ngagai sida semilan iku pengari rayat nya lalu meseti dipereti semua dalam serakup BN.

Nyaut tanya sentang kaul ke sama, iya madah aum bejuraika pekara nya deka diatur pengudah SUKMA 2016 lalu disadang sebedau Aum DUN berengkah.

“Ba maya nya ila kitai ulih nemu, lalu formula deka dibantai Kepala Menteri tauka Sekretari Besai,”ku iya nambah.

Raban semilan iku pengari rayat iya nya Datuk Dr Jerip Susil (Mambong), Ranum Mina (Opar), Dr Johnical Rayong Ngipa (Engkilili), Dato Gerawat Gala (Mulu), John Ilus (Bukit Semuja), Miro Simuh (Serembu), Tan Sri William Mawan Ikom (Pakan), Paulus Gumbang (Batu Danau) enggau Rosey Yunus (Bekenu).

Semua sida dulu agi ari tu udah ngenataika pinta nyereta PBB pengudah menang ba Pengawa Bepilih Besai Nengeri (PRN) Ke-11 ke diatur ba bulan Mei tu tadi.-UB

No comments:

| | Copyright © 2014 SARAWAKIANA